Blagur Awen Ben Bowen/Rhyfel

Blagur Awen Ben Bowen

gan David Bowen (Myfyr Hefin)

RHYFEL.

GYMRU, tua'r rhyfel
Gyrr dy lengau rhydd,
Buddugoliaeth dawel
Wawria ar Gymru Fydd.

Cwmwl yw amheuaeth
Wisg enfysau Duw;
Plyga i wasanaeth—
Cei wrth farw fyw.

Gymru, tua'r rhyfel—
Chollodd Ffydd erioed,
Buddugoliaeth dawel
Sydd yn swn dy droed.

Cadfaes yw amheuaeth—
Rhaid yw brwydro i fyw;
Gwel dy fuddugoliaeth—
Tragwyddoldeb Duw.

Gymru, cofia frwydro—
Brwydra ar ddihun;
Paid ag ofni nofio
Yn dy waed dy hun.

Duw a'r byd ga'th godi
Gymru ar dy draed;
Ni ddaw heddwch iti
Ond dros fôr o waed.

Methodd dy feudwyaeth
Ddringo i Hermon gwell;
Eill dy ymneillduaeth
Ddringo eto mhell?

22ain o Fedi, 1899.

Nodiadau