Caneuon Mynyddog/Colliant y Royal Charter

Caneuon Mynyddog

gan Richard Davies (Mynyddog)

COLLIANT Y "ROYAL CHARTER."

MORIAL, hir hwyliai'r "Royal Charter" hylon,
Heb arw agwedd ar wyneb yr eigion;
A difyr ddwndwr dyfroedd y wendon,
A'i ru o danynt dawelai'r dynion:
Eithr er alaeth rhuthrai yr awelon,
A huliwyd awyr a chymyl duon;
Cynhyrfa, digia y don!—croch rua—
Ei brig a lidia,—berwa 'i gwaelodion!

Corwynt erchyll sydd fel cawr yn tyrchu
Yr eigion erfawr, er ei gynhyrfu;
Ac mal i gwrdd y cymylau gorddu,
Môr gan ddryc-hin sy'n diflin ymdaflu;
Rhag gwel'd yr annhrefn mae'r dydd yn cefnu,
O! wg mantellawg, mae hi'n tywyllu!
Ac ar y llong, O! dacw 'r llu—dynion
Gan eu byw loesion yn gwyneb lasu!

Ffraeo 'n wgus wna'r dòn, a ffyrniga,—
Angau agwrddawl ar ei mwng gerdda;
A'i lli' angerddol y llong a hyrddia
I greigiog làn;—ar y graig y glyna:
Ah! edrych i wyneb y drych yna
Dŷn lwyth o alar,—dynoliaeth wyla;
Y llong a ymollynga—i'w dyfnfedd,—
Y waneg halltwedd ffyrnig a'i hollta!

O! ing y teithwyr!—eu tynged hwythau
Yw marw yn eigion môr a'i wanegau;
Ac uwch tabyrddiad 'storm a'i rhuadau
E gwyd wylofain, gwae, a dolefau;
Ar lanau tudwedd orlan eu tadau
Erfawr rengoedd a rifir i angau;
Ac yn mhob man ar y glanau—geirwon,
Ymrolia dynion mewn marwol dònau'

Nodiadau