Caneuon Mynyddog/Ni wn i p'run am hyny

Caneuon Mynyddog

gan Richard Davies (Mynyddog)

NI WN I P'RUN AM HYNY.
Y Miwsig yn y "Gyfres Gerddorol," Rhan IX., Mr. J. D. Jones, A.R.C.P.

CWRDD a wnawn yn nghysgod llwyn
A'r eneth wy'n ei charu,
Mentrais ofyn yn y fan
A ddoi hi i'r Llan eleni?
Ond trodd ei chwt a d'wedai'r fun,—
"Nis gwn i p'run am hyny."

Cyn pen deufis'r oedd y ferch
O draserch bron a d'rysu,
Holi wnai'n druanaidd iawn
A wnawn i ffyddlawn lynu?
D'wedais inau wrth y fun,—
"Nis gwn i p'run am hyny."

Pob hen langc o fewn y byd
A ddeil o hyd i daeru,
Mai gwell i ddyn fod heb un ffrynd
Na meddwl myn'd i garu,—
Byw yn fynach arno 'i hun, —
"Nis gwn i p'run am hyny."

Y sawl briododd forau'u hoes
Sy'n dal yn groes i'r rhei'ny,
Mai llawer gwell i bawb o'r braidd,
(Dros fyw ar haidd,) briodi;
Ffoledd yw fod dyn ei hun,—
"Nis gwn i p'run am hyny."

Myn'd ymlaen fel hyn mae'r byd
A phawb o hyd a'i stori,
Yn groes i'w gilydd ar un gwynt,
Nes ydynt bron a'm gyru
I ddweud wrth wrando pob rhyw ddyn—
"Nis gwn i p'run am hyny."

Nodiadau