Caneuon Mynyddog/Pan ddaw yr Haf

Caneuon Mynyddog

gan Richard Davies (Mynyddog)

PAN DDAW YR HAF.
Y Miwsig gan Mr. E. James, Newcross.

PAN ddaw yr haf a'i dyner hin
I loni bro a bryn,
Cawn drwsio bedd y gauaf blin
A blodau gwyrdd a gwyn;
Cawn weled myrdd o egin mân
Yn tyfu'n ngwres yr haul,
A chlywed cân yr awel lân
Ar dànau'r delyn ddail:
Cawn gasglu blodau hyd y glyn
A rhodio'r dyffryn dir,
A chanu marwnad gauaf gwyn
Ar goryn clogwyn clir.

Daw'r haf i dynu newydd gân
O dànau cangau'r coed,
Lle sang yr haf mae meillion mân
Yn tyfu'n ol ei droed;
Prydferthwch wisga am ei ben,
A'i ddwylaw'n llawnion sydd;
Ac ar ei fron mae'r lili wen
Mor deg a gwawr y dydd:
Cawn gasglu blodau, &c.

Ar wely'r haf, ffarwel i'r rhew
Roi blaen ei droed i lawr,
A'r lle bu'r eira'n haenen dew
Daw haen o flodau'n awr;
Daw'r byd i wenu ar y nen
Mewn newydd wisg o ddail,
Daw hithau'r awyr las uwch ben
I wenu bob yn ail:
Cawn gasglu blodau hyd y glyn
A rhodio'r dyffryn dir,
A chanu marwnad gauaf gwyn
Ar goryn clogwyn clir.

Nodiadau