Cerddi'r Eryri/Anwylaf Wlad fy Nghalon

Oddi ar Wicidestun
Clychau Aberdyfi Cerddi'r Eryri
Cerddi
gan William John Roberts (Gwilym Cowlyd)

Cerddi
Gelert Ci Llewelyn

ANWYLAF WLAD FY NGHALON

Anwylaf wlad fy nghalon
Am byth y caraf di,
Mae miwsig dy awelon,
Yn anwyl iawn gan i;
Hoff genyf yw dy fryniau,
Hardd yw pob rhan o'th dir,
Ond harddach yw, anwylaf wlad,
Dy gariad at y gwir.

Cydgan—
Anwylaf wlad fy nghalon,
O hyd fydd Cymru wen,
Dylifed holl fendithion
Y Nefoedd ar ei phen.


Dy anwyl blant a'th garant
Tra bywyd yn eu gwaed,
Dy holl elynion fynant
I lawr o dan eu traed:
Dan iau gaethiwus estron
Bu'th feibion amser hir,
Er hyn glynasant wrth eu gwlad
A’u cariad at y gwir.

Anwylaf wlad fy nghalon, &c.

Er gormes ei gelynion
Bydd Cymru'n "Gymru rydd,"
Ac anwyl gan ei meibion
Hyd wawr yr olaf ddydd:
Eu Ner bendigaid folant
Tra Brython yn y tir,
Eu hiaith a gadwant er pob brad,
A'u cariad at y gwir.

Anwylaf wlad fy nghalon, &c.

Nodiadau[golygu]