Cerddi Edern a Cherddi Eraill/Madonna y Gweithiwr
| ← Elinor Rhys | Cerddi Edern a Cherddi Eraill gan John Glyn Davies |
Y Cwpan Tsieni → |
MADONNA Y GWEITHIWR
JOSEF HORA.
Tŷ bychan yn lleithder i gyd, a seler dywyll ac afiach,
a gwely ag arno wraig, newydd esgor ar Fab y Dyn.
Ie, arogldarth y pentan myglyd, a sawyr trymaidd y tamaid,
a'r plant yn bentwr ar lawr, ar sachau gwellt yn gorwedd,
yn barod i ganu iti Garol Nadolig o drueni.
Arglwyddes Nef, dy erwinder! mor welw yw dy wynebpryd,
gwythienau yn glasu ar dy figwrn, dy wefus yn farwaidd heb liw.
Ymwadu, a gwrthryfel wedyn i'w gwel'd ar dy ael yn amlwg,
a gwddf, ie gwddf y trueni, wedi traflyncu er ys talm,
wedi cau er ys talm, ar eiriau tynerwch i gyd.
Tri Brenin Gwlen gynt, dyma'r tŷ na fynent mo'i weled;
nid oedd mo'r cyfoeth ganddynt i roi darn iti, Wraig a'th Fab,
oblegid i'r Seren Ddwyfol eu gyru yn bell o'u llwybr.
Aur, eli, a gwenau cariad, eu rhanu yn hael ddigrintach
i'r sawl oedd yn byw yn foethus, yn gynes, yn gorphwys yn esmwyth.
Arianog eu hunain hwy aethant i chwilio ar led am eu tebyg.
Ond Bethlem, Bethlem Judea, y mae hon a'i llond o dlodion,
deillion a chleifion, trueiniaid, dilety, carpiog a throednoeth.
Yma, yn anadlu yn swrth, fe aeth dy lendid oddiarnat,
a'r mebyn bach, y gwyrth hwnw, yn sugno llaeth chwerw dy fronau.
Ond dal di ar hyn, wedi iddo gyraedd ei ddeg a'r hugain,
i'r ddinas yr eiff ag efengyl gwrthryfel ar ei wefusau,
i gyhoeddi mewn ffair a marchnad fod cyfiawnder wedi dyfod,
i arfogi'r lluoedd, cânt ganddo freuddwyd a dur i'w dwylo.
Ni rydd ei hun iw groeshoelio, a'i weddi Gweithred fydd hono.