Diliau Meirion Cyf II/Rhagdraith
| ← Rhagymadrodd | Diliau Meirion Cyf II gan Morris Davies (Meurig Ebrill) |
Anerchiad i Meurig Ebrill ar ymddangosiad yr Ail Ran o "Ddiliau Meirion" → |
RHAGDRAITH
O bob dawn radlawn a roes
Yr Ion, yn gysur einioes,
Hynottaf peth yn natur,
Yw mwyn waith bardd mewn iaith bur.
D. Ionawr.
YMFFROSTIA y cryf yn ei nerth, y cybydd yn ei gyfoeth, a'r Bardd yn ei waith. Diflanodd nerth y cawr cad arnaf—bu y goludog farw; ond y mae ambell Fardd er iddo farw " yn llefaru etto.' Adeiladwyd cof golofnau gorwychion i gofio am ddewrder llyngeswyr a maeslywyddion, ar ol iddynt feirw, rhag i'w henwau fyned i dir anghof. Gwelodd Ardalydd Mon a Duc Wellington eu cofgolofnau wedi eu gorphen gan ddwylaw eraill; a dyma MEURIG EBRILL wedi byw i weled y maen olaf yn cael ei osod ganddo ef ei hun, i orphen ei gof-golofn yntau, yr hon a hyderwn a fydd yn sefyll "
"Tra bo'r iaith rydd
A Gwalia wrth eu gilydd."
Darfu i'r croesaw gwresog a dderbyniodd yr hen fardd oddiwrth dderbynwyr y rhan gyntaf o "DDILIAU MEIRION," a chymelliad calonog llu o gyfeillion ei ddwyn i benderfynu cyhoeddi yr "Ail Ran," yr hon sydd yn awr o'u blaen. Tybiwn fod yn hon bethau a foddlona bron bob dosparth o hoffwyr barddoniaeth, ond yn unig y rhai na hoffant ond yr hyn a wnant eu hunain. Canfyddir oddiwrth y cyfansoddiadau mai y Mesurau Caethion ydyw prif hoffder yr awdwr; ac nad ydyw gwneuthur englyn yn fwy poen iddo nag anadlu. Etto, cyfansoddodd lawer o ddarnau gorchestol yn y Mesurau Rhyddion; y mae amryw o honynt wedi eu rhoddi i fewn yma, ac aeth llawer o'i "gerddi boreuol" i dir anghof.
Hyderwn y ca y rhan hon etto groesawiad calonog fel y llall, ac na foddlona yr un Cymro i fod hebddi gan y cynygir hi am swllt.
Bellach, gellir cael gwaith y bardd ynghyd a'i ddarlun, am dri swllt, y rhai all fod yn gymdeithion anwylaidd i filoedd ag sydd yn meddu calon i gymdeithasu â gwrthrychau teilwng o serch. Dymunwn i'r hen fardd gael treulio y gweddill o'i oes mewn dedwyddwch, nes ei gelwir ar ddiwedd ei yrfa ddaearol i
"Ardal lawn o aur delynau."
- Brithdir, Mawrth, 1854.