Gwaith Barddonol Glasynys Cyfrol II/Rhagymadrodd i'r ail gyfrol

← Gwaith Barddonol Glasynys Cyfrol II

Gwaith Barddonol Glasynys Cyfrol II gan Owen Wynne Jones (Glasynys) golygwyd gan Owen Morgan Edwards

Cynhwysiad yr ail gyfrol →

SENEDD-DY OWEN GLYN DŴR, DOLGELLAU.

RHAGYMADRODD I'R AIL GYFROL.

Y MAE'R ddwy gyfrol yma'n cynnwys bron yr oll o waith barddonol Glasynys. Yr eithriadau yw rhai o ganeuon bore ei oes, ac, feallai, ganeuon diweddarach nas gwn i am danynt. Credaf fod pigion o'i ganeuon cyntaf yn ddigon ar hyn o bryd; rhoddais bob peth fedrais gael o ffrwyth addfed ei awen.

Cefais gynorthwy parod gan lawer o lenorion ac eraill; gwn, erbyn hyn, at bwy i fynd pan fydd arnaf eisiau cymorth parod a serchog i wneyd unrhyw gymwynas i lenyddiaeth Cymru ac i goffadwriaeth y rhai a'i carodd.

Codwyd rhai darnau o hen rifynnau'r Herald a'r Taliesin, a rhan fawr o lawysgrif Glasynys.

Ni fynnwn gymeryd arnaf fy hun benderfynu lle Glasynys ymysg beirdd Cymru. Yr wyf yn ei hoffi fy hun am ei naturioldeb, am ei gariad at y mynyddoedd, am ei awydd i addoli popeth yn hanes Cymru, ac am ei duedd i weled ac i ganmol neillduolion goreu ei genedl. Mae rhyw swyn cyfareddol yn ei ddarnau goreu; ac yr wyf yn sicr y dylasai ei ganeuon fod yn feddiant i Gymru cyn hyn. Nid esgeulusdod ei garedigion yw achos yr oediad, ond digwyddiadau nas gallesid eu rhagweled.

Hoffwn i'r ddwy gyfrol hyn fod yn gymorth i gadw ei gân a'i enw. Ac yr wyf yn disgwyl y daw digon o elw oddiwrthynt, o hyn i ddiwedd y flwyddyn, i roddi un o gerrig geirw Arfon i nodi'r fan yr hun Glasynys.

OWEN M. EDWARDS.

RHYDYCHEN, 1898.