Gwaith Barddonol Glasynys Cyfrol II/Y Gôg
| ← Arthur Llywelyn | Gwaith Barddonol Glasynys Cyfrol II gan Owen Wynne Jones (Glasynys) golygwyd gan Owen Morgan Edwards |
Golygfa ar yr afon → |
Y GOG.[1]
Y GWCW lwydlas dery gerdd
Yng nghoedwig werdd y faenol;
Ei hunodl ydyw anadl ha
Mae'r eira wedi meiriol;
Cw-cw! cw-cw! Awelon mwyn
Sy'n llawn o swyn hudolus,
Mae'r briall glân a'r meillion brith
Dan berlog wlith yn felus.
Yn iach, yn iach i'r gauaf oer,
Mae gwên y lloer yn gwynnu;
Yn iach i'r olwg noethlwm hyll,
Mae'r closydd cyll yn glasu;
Cw-cw! cw-cw! Mae'r irion ddail
A'r gwiail yn blaendarddu,
Mae gwên ar wyneb glân y glyn,
Mae bro a bryn yn tyfu.
Cw-cw! cw-cw! Mae'r adar mwyn
Yn dweyd eu cwyn i'w cymar;
Cw-cw! cw-cw! Mae'r deiliog lwyn
Yn llawn o swyn caniadgar;
Cw-cw! cw-cw! Awelon mwyn
Sy'n llawn o swyn hudolus,
Mae'r briall glân a'r meillion brith
Dan berlog wlith yn felus.
Nodiadau
[golygu]- ↑ Cerdd gwbl wahanol i'r gerdd o'r un enw yn y gyfrol gyntaf