Hanes Gwareiddiad/Rhagair
| ← Hanes Gwareiddiad | Hanes Gwareiddiad gan Gwilym Arthur Edwards |
Cynnwys → |
RHAGAIR
Yn ystod y gaeaf diwethaf astudiwyd Hanes Gwareiddiad gan ddosbarth ym Mangor dan nawdd Undeb Addysg y Gweithwyr, a chodai un o'i anfanteision o ddiffyg llawlyfr Cymraeg ar y pwnc.
Cais yw'r llyfr hwn i gyfarfod yr angen hwnnw, a dyna gyfrif am ei ffurf a'i faint. Hawlia maes mor eang, wrth gwrs, lyfr helaethach lawer na hwn: dymunol, yn wir, fyddai cyfres o lyfrau Cymraeg ar destunau'r penodau sy'n dilyn. Hyd oni cheir hynny neu un llyfr maith a thrylwyr ar yr holl faes, efallai y bydd croeso i fraslun neu amlinelliad byr fel hwn o hanes diddorol dros ben.
Nodais yng nghorff y llyfr ac yn yr ail atodiad nifer o lyfrau defnyddiol a chyfleus ar wahanol adrannau'r maes, a gwêl y cyfarwydd gymaint yw'm dyled i amryw ohonynt. Ni chwanegwyd mynegai am y tybiwn fod y manylion am gynnwys y penodau ar y dechrau a'r atodiad am yr amseroedd a'r prydiau ar y diwedd yn gwneuthur hynny'n ddianghenraid.
Uwchlaw popeth dymunaf ddiolch i aelodau'r dosbarth am y cwbl a ddysgais wrth geisio eu hyfforddi ac am y nosweithiau difyr a dreuliasom yn trafod ac yn olrhain yr hanes o oes i oes.
- Penygeulan, Bangor,
- Hydref, 1927.