Mi bellach goda' i maes

← Rhagom, filwyr Iesu

Mi bellach goda' i maes gan William Williams, Pantycelyn

Arglwydd y bydoedd fry →

334^[1] Yr Ardd, a'i Pheraroglau
66. 66. 88..

1 MI bellach goda' i maes,
Ar fore glas y wawr,
I weld y blodau hardd
Sy 'ngardd fy Iesu mawr:
Amrywiol ryw rasusau pur,
A ffrwythau'r paradwysaidd dir.

2 O! ddigyffelyb flas,
O! amrywioldeb lliw,
Hyfryta' 'rioed a gad
Ar erddi gwlad fy Nuw:
Gilead â'i haroglau pur
Bereiddiodd awel Canaan dir.

3 Mae'r pomgranadau pur,
Mae'r peraroglau rhad,
Yn magu hiraeth cryf
Am hyfryd dŷ fy Nhad:

O! Salem bur, O! Seion wiw,
Fy nghartref i a chartre 'Nuw.

William Williams, Pantycelyn

Ffynhonnell

1. Emyn rhif 334, Llyfr Emynau y Methodistiaid Calfinaidd a Wesleaidd 1930