Telyn Bywyd/Y Fedwen ar y Mynydd

← Y Glöyn a'r Hedydd

Telyn Bywyd gan Robert David Rowland (Anthropos)

Golygfa →

Y Fedwen ar y Mynydd.
The Silver Birch.

YN unig ar lethrau y mynydd ceid hi,
Ei brigwallt gusenid gan wlithos di-ri,
Gorphwysai'r aderyn rhwng cangau heirdd hon,
A'r gornant â'i heibio dan ganu yn llon:
Ymweled a'r fedwen arianaidd a thlos,
Wnai huan y bore ac awel y nos.

Daeth arglwydd y mynydd ryw ddydd heibio'r fan,
Gresynai mai'r anial di-nawdd oedd ei rhan,—
Ti, blentyn y mynydd, cei ddyfod i lawr,
Dy gangau arianaidd gysgodir bob awr.
Mae genyf ardd gynhes, ac uchel ei chlod,
Hardd fedwen y mynydd, ac yno cei fod.

Symudwyd y fedwen, fe'i cludwyd i lawr
I ganol y blodeu pereiddiaf ei sawr,
Ond wylo am awel y mynydd wnai hi,
Am fwswg, a rhedyn, a murmur y lli;
Tywalltai ei hiraeth i fynwes y nos,,
A gwywodd y fedwen lle gwenai y rhos!