Prawfddarllenwyd y dudalen hon
TELYNEGION❃❃❃
❃❃❃A SONEDAU.
—❃—
I'R LLOER.
Dywynnai i'm hystafell hanner nos.
DIOLCHAF iti heno
Garedig leuad dlos,
Am ddyfod a goleuo
Fy 'stafell hanner nos;
Yn dy oleuni rhadlon
Bu llawer mab a merch,
Cyn hyn yn newid calon
Yn oedfa santaidd serch.
Y truan tlawd siomedig
Na wybu barch a bri,
A grwydra yn lluddedig
Wrth dy oleuni di;
Pob llewych wedi peidio
Yn holl ffenestri'r dref,
Tra thithau yn goleuo
Ei lwybrau dyrus ef.
Garedig leuad hawddgar,
Wyt yn arweinydd cun,
Wrth daflu d'oleu llachar,
Ar ddyrus lwybrau dyn.
