Tudalen:Brethyn Cartref.pdf/93

Oddi ar Wicidestun
Gwirwyd y dudalen hon

"Be' sydd arnat ti 'rwan?" ebr Mari Huws, wrth weled Catrin yn dechreu wylo.

"Mae'n gwilydd gen i trosoch chi, mam" meddai Catrin.

"Cwilydd, aie?" ebr Mari Huws, "cwilydd gen ti drosta i, aie? Mae'n gwilydd gen i drosot ti, yn siwr, yn hudo thyw greadur fel hyn i'r fan yma i beri trafferth ac i dynnu pobol i siarad am danom ni!"

Torrodd Catrin i wylo, yn fwy o ddigofaint na dim arall.

"What is it all about, my dear?" meddai'r Sais bach, braidd yn ofnus.

Ni wyddai Catrin pa beth i'w ddywedyd, ond teimlodd ei bod ar ben arni, ac mai y tro ffolaf a wnaeth yn ei hoes oedd gadael i'w chariad fynd gyda hi adref. Eto, yr oedd digon o ddyfais ym mhen Catrin, ac ni bu yn ol o wneud y goreu o'r gwaethaf. Dywedodd wrth y Sais fod ar ei mam eisieu iddi briodi rhyw ddyn cyffredin o'r ardal, a'i bod wedi gwylltio wrth ei gweled hi yn dyfod ag ef gyda hi, megis ar waethaf ei mam.

"Ond waeth gen i beth ddywed fy mam," ebr hi, "y chi fynna i tra mynnwch chi fi!"

"Dowch gyda fi oddi yma, fy nghariad i," ebr Smith druan, ac aeth yn ol i'r cerbyd. Aeth Catrin ar ei ol yntau.

"Da b'och chi, mam, welwch chi byth mona i eto," medda hi.