Prawfddarllenwyd y dudalen hon
Y LLYTHYR
YSGRIFENNAIST uwch y dôn,
Eneth lon;
A daeth cennad bychan, hardd,
At dy fardd.
Edau arian loyw a chref,
A ddug ef;
Ac mae gwifren dros y lli,
Mwy, rhwng meinir wen a mi.
"O'r cyhydedd," medd fy merch,
"Y daw'r serch;
Lle mae nefoedd las, ddilen,
Byth uwch ben;
Lle mae'r môr yn gân i gyd,
Fel fy myd."
Haul a nefoedd las a chân
Yw dy ged, fy Luned lân.
Murmur môr oedd yn dy glyw,
Eneth fyw;
Murmur dyfnach môr na'r lli
A ddaeth i mi.
Clywais furmur eigion serch,
Fwynaf merch;
Ac fe eilw yn fy mron
Ddyfnder ar dy ddyfnder llon.
1898.
