Tudalen:Caniadau Gwili.djvu/77

VII
Nid ydyw Natur fawr yn mynd yn hen,
Ac nid oes grychni henaint yn ei gwên;
A sibrwd wrthyf mae am ieuanc Fardd
Sy'n gosod ar ei dail ei ddidranc lên.

Duw ieuanc ydyw Duw: Duw'r gwanwyn clir;
Y Duw sy'n cyffro calon oer y tir
I guro'n gyflym, ac yn galw cân
Yn ôl i neuadd fawr y goedwig ir.

Duw ieuanc sydd yn gwisgo'r ddôl fel gardd,
A ieuanc law fu'n llunio'i mantell hardd;
Duw ieuanc drwy enfysau'r glomen lân
Fel Ysbryd wedi perlesmeirio a chwardd.

Curiad ei galon Ef yw'r cyffro pêr
Sy'n cerdded Natur, ac yn llonni'r sêr;
Ac nid yw chwarae'r oen sydd ar y bryn
Ond cyffro curiad calon ieuanc Nêr.

Angylion hynaf nefoedd, hwy a fydd
Ieuengaf creaduriaid bythol ddydd;
A Thad Ysbrydoedd, y Tragwyddol Fod,
Yw'r Ysbryd hynaf a'r ieuengaf sydd.