Prawfddarllenwyd y dudalen hon
Yna y llais ddiflannodd,—ar hwyrwynt
Trwy'r oror drist wylodd;
A niwl du anaele dodd
Lwyd dwyni y wlad danodd.
Eithr yn ddirgel rhywelais—heibio oer
Aberoedd du tristlais;
Ac i'r oed doi'r gŵr wawdiais
Yngo fal hud angof lais.
Ar ei grog draw yn crogi—yn ei waed
Gwelwn ef ar drengi;
A'r awel oer a'i phêr li
Hyd ei hirwallt yn torri.
Rhyw aethus lwydwawr weithion—hyd oror
Y dwyrain diglion
Dorrai fel ar arch dirion
Y gŵr gaid ar y grog hon.
Un ennyd cyn ei huno—dywedodd
Diadwyth a drengo
A dydd ei ddyhewyd o
I'r awyr yn dwyreo.
"Wele, ferch, dyrchafael fydd,—yno tau
Pob rhyw storm annedwydd;
Ac i'r oed is y coedydd
Cariad rhos o'i dranc hir drydd."
