Prawfddarllenwyd y dudalen hon
YR AFON GEIRGH
Haul cynes ar ôl glaw drwy'r nos,
a'r ffyrdd yn wlybion,
a ffrydiau'n tywallt o bob ffos
i lenwi'r afon.
Y cefnlli'n dwndwr wrth y cafn,
dros risiau creigiog,
ac at y bont a thrwy ei safn
yn gyru'n donog.
Lliw'r lli'n awgrymu pnawn o hwyl,
a'r dŵr mewn cywair,
yn gyfiawnhad am gadw gwyl,
a nôl yr enwair.
Ac ar ddŵr crych yn troi i'r llyn,
rhoi'r pry wrth amcan,
a gweld y lein yn sythu'n dyn
o dan y dorlan.
A blaen yr enwair gyda hyn
yn gwingo'n sydyn:
un wib, a brithyll brych a gwyn
ar welltglas wedyn.
A symud at y graig lle mae
y llwyni eithin:
penfelyn, er gweld dyn, nid ae
oddiar ei frigyn.
Aderyn cywarch brongoch twt,
yn hedeg allan;
ehediad byr o ffrwt i ffrwt,
a chlochdar bychan.
