Tudalen:Chydig ar Gof a Chadw.djvu/39

Na chymer arnat wrth dy frawd,
Dy chwaer, na neb dy fod yn dlawd,
Dy gynorthwyo ar dy rawd
Wna f'ewyrth.

Os byth y byddi'n brin o bres,
Wna crafu'r gwegil fawr o les;
Un da ar ol pob Hol-i-des
Yw f'ewyrth.

Os na bydd modrwy am dy fys,
A'r hin yn boeth, a thitha'n chwys,
Rhoi benthyg arian ar dy grys
Wna f'ewyrth.

Ar ol bod fis yng nglan y môr,
A myned drwy dy holl ystôr,
'Does undyn byw mor driw a drôr
Fy ewyrth.

Fe gymer gennyt, na lwfrhâ,
Dy ambarel, os yw'n un da,
A chadw'th Dopcot dros yr ha'
Wna f'ewyrth.

Rhoi serch ei galon ar dy Watch,
Ond gwrthod trowsus hefo patch,
Wna f'ewyrth.

Mi glywais rai mor hyf a deyd
Nad ydyw'n bechod ar neb wneud
Fy ewyrth.

Ond da waeth beth ddywedo rhai,-
Os heb ei eni heb ei fai,"-
Caredig wrth bob Nith a Nai
Yw f'ewyrth.

Os gwnaiff o di o dan dy drwyn,
Nid oes mo'r help fy nghyfaill mwyn;
Hen ŵr ga'dd ganiatad i ddwyn
Yw f'ewyrth.