Prawfddarllenwyd y dudalen hon
Fab Sarug, hyf hap siriawl,
Fab Ragau forau ei fawl.
Mab oedd Ragau glau ei glêr—hoff wiwlwys,
I Phalec, fab Heber,
Fab Sala, ddyn da, ddawn dêr,
Hybarch fab Cainan hoywber.
Cainan, wr ffraeth aceniad—a'i wedd fwyn,
Oedd fab i Arphacsad,
Fab Sem brydferth ei dremiad,
Benaf ŵr, fab Noah fâd.
Mab ffyddlon eon oedd Noa—lyw mawr,
I Lamec didraba,
Fab hawddgar, doethgar, a da,
Mwyth oslef, i Methus'la.
Methus'la, gwrda mawr gêd—byw anian,
Fab Enoc, fab Jared,
Fab Maleleel, y gynfilfed,
Fab Cainan groywlan ei gred.
Cainan oedd fab cu iawna—i Enos,
Hynod ei fwyneidd—dra,
Fab Seth, y difeth ddyn da,
Wybyddir, oedd fab Adda.
Ac Addaf, araf wron,—nodedig,
Yn dad i ddynolion,
Heb anaf, ddyn byw union,
Di warth, a greodd Duw Ion.
