Prawfddarllenwyd y dudalen hon
I'R LAN.
I'r lan,
'R wy'n ceisio dringo,
Er yn wan.
Drwy anhawsderau mwy na'u rhi'
O dwrf y byd, i
Galfari.
I'r lan,
Yn llaw fy Ngheidwad,
Er yn wan;
Mi lynaf mwy, nes try fy nghri
Yn Salm o fawl, ar
Galfari.
I'r lan,
'R wy'n teimlo f'enaid,
Er yn wan,
Wrth Orsedd Gras yn agos i
Gymdeithas Duw, ar
Galfari.
I'r lan,
Uwch law cystuddiau,
Yn y man,
Câf ddiange rhagddynt drwy y lli'
I ddiolch byth, am
Galfari.
PWY SYDD YN GORWEDD YMA?
Pwy sydd yn gorwedd yma
O fewn ei argel fedd?
Atteba'i enw ar y maen,
Y baban bach mewn hedd;
Y baban fu yn chwareu
Yn llon o gylch ei gryd,
A wywodd cyn i wanwyn oes
Addurno llwybrau'i fyd.
