Prawfddarllenwyd y dudalen hon
BRYNIAU MEBYD.
HENFFYCH fryniau bore bywyd.
Hardd yw'ch gwedd ar hirddydd haf.
Gwelais chwi drwy ddrychau atgof;
Heddyw gweld heb gyfrwng gaf.
Sengais drumiau bryniau eraill—
Ambell fryn o uchel fri.
Ond er tlysed rhai ohonynt,
Chwi yw bryniau 'nghalon i.
Fryniau hoff fy maboed dedwydd,
Cyrchu atoch heddyw wnaf.
Yn fy hiraeth am gyfoedion
Mwyniant yn eich cwmni gaf.
Megis chwithau carwn godi
'Mhen uwchlaw holl darth y llawr.
Megis chwithau'n amyneddgar
Ddistaw ddisgwyl am y wawr.
CYMER FI.
(Ar sefydliad y Parch. R. J. Pritchard, B.A., yn weinidog eglwys Mynydd Seion, Ponciau).
YN oriau bore bywyd
Daeth cri at lencyn mâd
I wrthod ffyrdd esmwythyd,
A gadael tŷ ei dad.
Llais mwyn yr Iesu oedd y cri
Yn tyner erfyn, "Dilyn Fi."
