Prawfddarllenwyd y dudalen hon
Y MEDDYG.
'R OEDD Mynydd Hiraethog yn huno
Yn dawel dan gwrlid gwyn,
A'r bugail a'i gi yn lluddedig
Wrth ddringo llechweddau y bryn.
Ond torrwyd distawrwydd y wenfro
Gan ffrwydriad echryslon gerllaw.
Lle gynt yr oedd hedd a llonyddwch,
Yn awr yr oedd cyffro a braw.
Dau fachgen yng ngwanwyn eu gyrfa
Dan glwyfau ofnadwy a gaed,
Yn gorwedd ar wely o eira
A gochid yn gyflym gan waed.
"Y meddyg! Y meddyg, heb oedi!
Carlamer i'w gyrchu bob cam."
"Ni ellir ei gyrchu ar geffyl;
Mae'r cyfrwy gan arall, 'mam."
Dos, dos!" A'r marchog di-gyfrwy
I'w hirdaith gychwynnai ar frys.
Ymlwybrent o luchfa i luchfa,
A'r ceffyl yn furum o chwys.
