Prawfddarllenwyd y dudalen hon
WYT YN DAWEL
HENO mynnwn am ennyd
Ymryddhau o boenau'r byd;
A neshau, yng nghwmni'r ser,
O dan ffurfafen dyner,
Tua'i hunig unig annedd,
A gorffwys ar bwys ei bedd.
Anwyled, mwyned i mi,
Yr annedd lle yr huni!
Fy morau olau helynt,
Felusion adgofion gynt!
Wyt yn dawel tan dywod,
Gwiwfan i flinedig fod;
Minnau yno, 'mhen ennyd,
Fêl hun gaf, wyf flin i gyd.
EI WELED FEL Y MAE
ANGYLION uwch y ser,
Beth yw eich nefoedd chwi?
Pa beth yw swyn eich anthem bêr,
Beth eich ardderchog fri?
Golygfa dawel ar ei wedd,
Ah! Dyna 'u nefoedd, dyna'u hedd.
Ei weled fel y mae,
Gweld sylwedd nefoedd yw;
Pa beth yw siomiant, beth yw gwae,
Ond absenoldeb Duw?
Cawn nofio ar fôr o hedd di-drai,
Fyth wrth ei weled fel y mae.
Gorffennaf, 1854.
