Cywir roent i'r Hwn fu'n creu—yn gyson,
Eu mawl o galon ar gwmwl goleu.
Parhau y mae deddfau'r dydd,
Ein lluniaeth a'n llawenydd,
Yr haul sydd yn rheoli
Pob dydd o newydd i ni;
Hithau'r lloer lathr a'i llu
Ar y nos sy'n teyrnasu.
Parhau o hyd y mae darpariadau
Y DUW mawr yn y cyson dymhorau;
Fe nodir eu trefniadau—yn gywraint,
Diaflerw beiriant fel hwyr a borau.
Y GWANWYN a wisg wenau,
Mewn llawn nwyf mae'n llawenhau;
Yn y gwanwyn y genir
Prydferthwch tegwch ein tir;
Yr amrywiog, flodau bywiog,
Eu goludog frig a ledant,
A'u sawrau a brysurant,—drwy y nen,
Yn chwai ar aden y chwa'r ehedant:
A charuaidd chwareuant,—mewn purdeb,
Bywhad hyd wyneb y byd a daenant.
Yna'r mwyn wanwyn mewn hedd,
I'r HAF a dawdd yn rhyfedd,
Siglo'n dawel dan yr awel
Dyner, rywiog,
Mae meusydd meith toreithiog—gwair ac ŷd,
Heblaw y diwyd goedydd blodeuog.
Dilyna'r HYDREF hefyd
A defnydd da bara'r byd,
