Prawfddarllenwyd y dudalen hon
BLAENOR
(MR. ROBERT ROBERTS, PEN'RALLT),
Yn ei ddydd, yn ôl ei ddawn—a'i ynni
Bu yn flaenor ffyddlawn;
Llanwodd ein cyfaill uniawn
Oes er lles, hyd fesur llawn.
Mewn hiraeth mae'i hen oror—ar ei ôl,
A byrhad ei dymor;
Gŵr â'i eisiau ar Groesor,
O lesâd yn Eglwys Iôr.
MAM DDA
Mam annwyl na fu mo'i mwynach —huna
Ennyd yma bellach;
Daw dydd bydd fil dedwyddach
Heb ôl ing, yn gwbl iach.
SYR OWEN M. EDWARDS
OWEN EDWARDS, un ydoedd—i Walia'n
Anwylyd ei miloedd;
Cannaid lamp ein cenedl oedd,
Rhôi ei llewych i'r lluoedd.
YN Y MOR
O'r chwarel arw ei cherrig—yr est ti
I'r ystorm fileinig;
Dan y dyfnion donnau dig
Heno yr huni'n unig.
