Prawfddarllenwyd y dudalen hon
GWILYM DEUDRAETH
Heddiw gwelw ddigalon—yw Gwalia
Heb ei Gwilym radlon;
Eleni aeth saer englynion
O dir y byw, loes yw sôn.
Gwilym heb radd o goleg—a garai
Ein gwerin bob adeg;
Yn ein tir o'i rawnwin teg—
Ffrwyth ei ddawn—ni chawn 'chwaneg.
Ei enw yn hir yn ein hiaith—a seinir
Am wasanaeth hirfaith;
Mae'i emau yn ein mamiaith
I'w mawrhau am oesau maith.
BEDDARGRAFF MILWR
Ym more'i oes, er mawr resyn,—is hon
Y dwys huna glanddyn;
Ef fu lewaf dewraf dyn
Rhwng Gwalia a rheng gelyn.
MILWR DEWR
Is y llech ddinod, fechan,—ymwelydd,
Huna milwr, druan;
Un dewr a fu yn darian
Rhyngot ti a'r rhengau tân.
