Prawfddarllenwyd y dudalen hon
XIV.
SERCH.
Di-orffwys fel y llanw,
Anwadal fel y dòn,
Yw gorllif gwae a gwynfyd serch
Ar dyner draeth y fron.
Mae'r gerdd i arfod gofid
Yn cerdded gyda'r dydd,
A châs a chariad gledd yng nghledd
Ar lawer cadfaes prudd.
Mae serch fel blodyn draenen
A bidog dan ei glôg,
A gwaed ei fron ar aden chwim
Ffyddlondeb gwas y gog.
Gall blethu brwyn a rhedyn
Yn dorch am arlais Mair,
A chuddio pigyn llym 'run pryd.
Ym mhleth ei llaeswallt aur.
Gall daflu gwŷll a brieill
Yn balmant dan ei throed,
A gosod clwm o flodau'r glŷn.
Ar fedd yng nghudd y coed.
