Prawfddarllenwyd y dudalen hon
Y Tair Gardd.
I.
DRAW, draw yn mhell ar fore cain,
A'r cread oll yn ieuanc ac yn hardd,
Heb gysgod gwae, a'r blodau heb y drain,—
Yr Arglwydd Ior a blannodd ardd.
Eden ddedwydd! Wynfa burlan!
Cartref diniweidrwydd dyn:
Lle murmurai ffrydiau gloewon,
Lle sibrydai yr awelon
Gyfrinachau Duw ei hun.
"Yn Eden,"—cofir hyny byth,―
(Er iddi hir ddiflannu),
"Bendithion gollwyd rif y gwlith,"—
Ond aros wna er hyny,—
Aros drwy yr oesau i gyd,
Er blinderau anial fyd,
Aros byth mae'r adgof hardd,—
Yr Arglwydd Ior a blannodd ardd.
