Prawfddarllenwyd y dudalen hon
Y PROFFWYD.
Pwy sydd yn canu ar y bryniau draw,
A thlysni'r gorwel pell yn llanw ei fryd?
Pwy sydd yn ymdaith trwy ddiffeithwch byd,
A rhosyn Eden newydd yn ei law?
Wyneba wynt gaeafnos, ac ni thaw,
Ond canu a lamp ei ffydd yng nghynn o hyd;
Anturia'r afon heb na phont na rhyd,
A'i hyder yn sarhau ysbrydion braw.
I'w ymbil taer fe egyr pyrth y nef,
A thawdd cadwyni'r wyllnos ar ei rawd;
Holltir y graig â'i deyrnwialen ef,
A gado heol rydd i gaethion tlawd.
Caiff gwsg cyn hir, a'r crinddail drosto'n drwch,
A chlod amhrydlon yn cysegru'i lwch.
