Prawfddarllenwyd y dudalen hon
Lle'r oedai'r glasniwl ar yr hesg a'r brwyn,
Deallwn lafar ei gwylltineb hi;
A rhyw beroriaeth uwch peroriaeth llwyn
Oedd lleisiau'r gweundir yn fy nghalon i.
Ni chriai edn wrth ddianc dros y ffin
Nad oedd ei enw yn ebrwydd ar fy min.
Mi hoffwn ado'r afon yn y coed,
A'i chwrddyd fry ym mrwyn y rhostir maith.
Chwimwth y codai'r giach dan fy nhroed,
A gwibio draw fel saeth drwy'r niwlen laith.
Araf y trôi'r cornicyll yn y nudd,
A thrymder ffarwel yn ei chwiban prudd.
Cofiaf y petris uwch yr annedd wen
Yn ffoi ar drystiog ffrwst o gŵysi'r yd,
A'r hebog craff yn hofran yn y nen,
A'i lygad ar y g'lomen wen o hyd.
Druan o honi, obry'n goch ei bron,
Rhoed creulon doll ar ddiniweidrwydd hon.
