Prawfddarllenwyd y dudalen hon
Dychwelais wedi'r drin i hedd fy ngwlad,
A dyna'r hwyr a'm canfu'n wael fy llun.
Ba ennill ydoedd trechu yn y gâd,
A cholli'r cyfan yn fy mro fy hun?
Nid oedd na chri croesawus yn y glyn
Na golau yn yr annedd ar y bryn.
Er hyn, mi fentrais amau'r llythyr hy,
A throi i ganu obry yn y glyn.
Os na ddôi llewych o'r hen dyddyn fry,
'Roedd llusern fach fy ngobaith eto 'n nghynn;
A thyngais ganwaith ar hen lwybr y rhos
Y llamai Gwen i'm cwrddyd ar y clôs.
Llefais ei henw rhwng y muriau llaith,
Ond ni ddôi ateb namyn llef y gwynt.
Chwiliais am dani hyd y rhostir maith,
Cwynais, "Ai dyma'r wlad a gerais gynt?
O, na chawn heno oddef bryntni'r gelyn
Rhag gorfod goddef sawr yr eithin melyn!"
