Prawfddarllenwyd y dudalen hon
III.
Pwy yw hon ddaeth i'm poeni
Ag ifanc wên? Hen yw hi,
Ffrâm nychlyd, oerllyd yn dwyn
Miragl gogoniant morwyn.
Rhuddain ei grudd, honni gwres,
Ond manod yw ei mynwes.
Ffei ar y wrach fantach, fain,
Corres y geuddaint cywrain!
Anhygar tân ei gwrid hi,
Cwrel apothecari,
A blawd, ail manllwch blodau,
Yn dofi ei gochni gau.
Diau ofer ei dyfais,
Aeth haint ei henaint i'w hais.
Flawdog, wridog biogen,
A gêl calch ei golwg hen?
Cafod o'r nef a'i cyfwrdd,
A syrth hug ei ffug i ffwrdd;
A gwelir, lle toddir twyll,
Adwedd blynyddoedd didwyll.
Ceir i'w chern hacrwch hirnych,
A derfydd hoen y croen crych.
