Prawfddarllenwyd y dudalen hon
A gwawr y bore 'n torri,
Fe ddaeth i gyrrau'r tir
A lywiodd meibion Bleddyn gynt
Drwy lawer helynt hir.
Lle bu ddigonedd unwaith
Nid oedd ond anrhaith du,
A gwŷr y goror wedi ffoi
Rhag creulon estron lu.
Daeth dewin i'w gyfarfod
Ar odre coediog allt,
Yn grwm ei gefn a byrr ei gam
A hir ei farf a'i wallt.
"Ha! Owain ap Cadwgan,
Pa beth a fynni di ?"
"O ddewin hysbys, ceisio'r ferch
A gerais yr wyf fi."
"Och! Owain ap Cadwgan,
Mynega im pa le
Yr oeddit pan fu gwympo Rhys
A llosgi llys y De?"
"Ni chwympwyd llew Deheubarth,
Nid oedd a drechai Rys!"
"Mae castell estron ar y fan
Lle'r oedd ei lydan lys!"
