Wel, wel, fe fydda' i'n holi—mi fy hun
Am fy annwyl gwmni;
Ym mha ran y mae'r rheini,
A sut un oedd Risiat ni?
O! frawd cun, ddifyrred y co'—gwannaidd
Sy gennyf amdano;
Cywrain eilun cryn wylo
Fu'r ddel afr[1] o'i ddwylaw o.
Aml lythyr gadd ei yrru
Fel i'r bedd, oferedd fu—
Disgwyl Risiat, dim ateb.
A ddeuai'n ôl? 'Wyddai neb.
Ofni hyn a wnâi fy nhad—hwyliai 'mhell
Chwilio 'mhob cyfeiriad;
Tra'n ei long, pa estron wlad
Na fu'n nod i'w fynediad?
A Risiat! onid gresyn
Oedd iddo lithro fel hyn?
Cariad ifanc ar dyfiant
A aeth o blith wyth o blant.
Ni fu i neb ei anfon o—mi wn,
'Ddarfu 'mam mo'i ddigio;
Ond hwyrach daw trymach tro
A'i gyr adref o grwydro.
Ac os daw ar darawiad,—ei air fydd
"O'r fath gyfnewidiad";
Wyla ar ei ddychweliad
Am na wêl o byth mo 'nhad.
- ↑ Model o afr fechan o'i waith.
