Prawfddarllenwyd y dudalen hon
LLAW "CYFAILL."
MAE llaw a gymell o hyd,—llaw cyfaill,
Cofia, yw hi hefyd;
Ymorol rhag cymeryd,
Fe all droi yn "gyfaill" drud.
ENW IESU.
ENW hawdd i'w gynganeddu,—enw
Annwyl ymhob teulu;
A oes gair drwy'r Gyfres gu
Neisiach na'r enw Iesu?
IESU'N GOSTEGU'R STORM.
MEWN ochain a mi yn Achor—mewn ing,
Mewn ofn ar y cefnfor,
Mewn alaeth a min elor
Mae'r Iesu'n gostegu'r storm.
BRIWSIONYN.
ERYS Swyn mewn briwsionyn—o'r lliain,
Er lleied yw'n disgyn;
Yn gymysg â'r cenllysg gwyn
Haid o'r adar a'i hedwyn.
CENEDL Y CYMRY.
HUAWDL genedl ag wyneb—agored,
Gwerin cân a phurdeb;
Ei gwendid? Diffyg undeb—
Dyna yw ac ni wad neb.
