Prawfddarllenwyd y dudalen hon
TORRWR BEDDAU.
LLE buos. wrth fynd drosti—ar un cwr
Yn cael dy fodloni
Mae dy weryd hyfryd di,
Ond arall fu'n ei dorri.
GOF.
Er gwaeled gwanned y go',—ac oered
Y garreg sydd arno,
Yn unfryd farn ei henfro
Yr hyn ni thyr a wnaeth o.
ER COF AM DDYFED.
DYFED fad, ei fywyd fu—yn eilun
I hen wyliau Cymru;
Hir gofiaf ei ddyrchafu
I'r Maen Llog er mwyn y llu.
I'w gedyrn olygiadau,—i'w ddifyr
Ddi-hafal ddarlithiau,
A'i lân gerdd ddi-olion gau,
Rhoes y gwir ei wisg orau.
Eglura cwyn a galar cu—y fro
Ei fawr werth a'i allu;
I glir uniawn gloriannu,
Dyn o faint Dyfed ni fu.
Ni wêl ei farn olau fedd—hyd einioes
Y dyner gynghanedd;
Erys o hyd ar ei sedd
Yn nheml hudol melodedd.
