Prawfddarllenwyd y dudalen hon
XXII. Y GWYNT. 1
MAE'th chwiban leddf drwy dwll y clo
Fel pibau pagan er cyn co';
Mae'th oernad yn y simdde fawr
Fel utgym yng ngorymdaith cawr.
Mae'th feinlais pêr drwy holltau'm bwth
Fel gorchest Hiraeth ar ei grwth;
Mae'th gryndod allan wrth fy nôr
Yn awr fel dirfawr derfysg môr.
Ond pan agorwyf ddrws i'r traeth
I weld y llanw'n wyn fel llaeth,
Ni welaf undim ond y waun
Yn wyneb lonydd fel o'r blaen.
A chyffro lleuad lawn a ffy
Yn ofer yn y nefoedd fry,
Fel un a rêd o lam i lam
Hyd feysydd cwsg heb ennill cam.
