Y Fainc Sglodion/Awen y Chwarel

Y Fainc Sglodion

gan John William Jones

AWEN Y CHWAREL.
COFIO DEWRION Y RHYFEL MAWR.
D.J.

Rhyw chwerw glwy' o'r math mwya'—ydyw byw
Heb "Dei bach Crimea";
O'i ôl ef fel awel ha',
Hiraeth yn brudd alara.

J.J.

Wr hynaws, dy fwyn dirioni—a ddeil
Trwy'r dduloes o'th golli ;
Gwlad wen uwch tân—belenni,
Yn ddi—staen gyrhaeddaist ti.

ENWAU'R HOGIAU.

Enwau ein hogiau glanwedd—a erys
Mewn hiraeth a symledd;
O helynt brwnt dialedd
Eu llwch hwy gaiff bellach hedd.

BONEDDWR.

Hen drempyn gwael ei olwg
Oedd ef yng nghyfri'r byd,
Yn gwerthu rhyw fân nwyddau
A chanu ar y stryd.

Nid oedd ei gân yn swynol
Crynedig oedd ei lais;
Ond tystiai'i wedd anghenus
Mai cywir oedd ei gais.

I mi boneddwr ydoedd,
Er nad oedd ganddo 'stad;
Oni safodd ef yn bennoeth
Pan basiodd corff fy nhad?

Nodiadau