Yng Ngwres y Dydd/Cilio mae'r Huan

← Beth ydyw'r Newyddion

Yng Ngwres y Dydd gan Joseph Jones (J. J. Drefnewydd)

Bendith y Cwmwl →

CILIO MAE'R HUAN!
(Ysgrifennwyd Hydref, 1917).

CILIO mae'r huan, draw dros y marian—
Prydferth yw'r lleuad, fry yn y nen;
Yno mewn lludded, bychan ei nodded,
Llencyn o filwr orphwys ei ben;
Myrdd o adgofion leinw ei galon
Am ryw wyn fwthyn, camfa, a dôl;
Cri yr awelon adsain ei gwynion—
Gofyn a gaiff ef ddychwel yn ol.

Torri mae'r wawrddydd—clir ael y mynydd
Mawr ydyw ymchwydd terfysg y gâd;
Ond dwed banllefau creulawn fagnelau,
Na chaiff y milwr ddychwel i'w wlad;
Bedd bychan dorrir, yno fe'i rhoddir,
Mwyach nis gwelir lencyn hardd bryd—
"Croes" fach i'w gofio—engyl i'w wylio,
Tawel ei huno—dedwydd ei fyd!

Chwely'r cymylau—paid y taranau—
Dyfod mae dyddiau nefol eu bri;
Haul i dywynnu—adar i ganu—
Blodau i wenu, eto fydd hi;
Cenir i'r "gwron" felys alawon,
Cynhes fydd calon hen Walia lân;
Ac fe ddaw'r bore, eto bydd yntau'n
Flaenaf y rhengau—'n uchaf ei gân.!