Yr Awen Barod/Bwgan Brain Bryntirion

Yr Awen Barod

gan William Thomas Edwards (Gwilym Deudraeth)

golygwyd gan John William Jones

TRANC BWGAN BRAIN BRYNTIRION.

FRAIN, tyrrwch i Fryntirion,—neu hedwch,
Chwi gewch hadyd ddigon;
Mae'n awr ar lawr ger y lôn
Y bwbach yn gyrbibion!

I siglo'i rags gwael a rhydd—wele mae
Awel môr a mynydd;
Ac O! y fath byncio fydd
Uwchben ei oerllwch beunydd!

Heb wraig na neb ar ei ôl,—heb eneth,
Na neb un perthynol;
Lle diserch mewn llaid oesol
Yw gwely'r ffug wyliwr ffôl.

Ha fwbach, deuaf heibio—i dy fwth,
Ddinod fan rhaid cofio;
Dinodedd ar dy fedd fo—
Dinod yw'r hwn sy dano.

Cariwyd dy wisg bob ceryn,—a diau
Na adewaist ronyn
O d'ôl, yr hynod elyn,
Ni ddaeth dim moddion i ddyn.

Gwael yw dy lety, gwelwn;—hyd y bedd
Blodau byw ni roddwn;
Ar garreg las anrhegwn
Y gŵr ffug â'r argraff hwn.

"Bechadur, lle bwbach ydyw—a gaed
Tan goeden mewn distryw;
Uwch ei fedd cofia heddiw
Ni ddaw hwn o farw'n fyw!"

Nodiadau