Yr Haf a Cherddi Eraill/Pantycelyn

Yr Haf a Cherddi Eraill

gan Robert Williams Parry

X. PANTYCELYN.

BERERIN pererinion llwyd eu gwedd
Sy a'th wyneb pryd ynghrog ar fur fy nghell,
Cenaist ar ddyrys daith tu yma i'r bedd
Ganiadau crythor clir y Jiwbil bell.
Dy drachwant sanctaidd, uwch tabyrddau'r glêr,
Seiniodd yr Enw nad adnabu dyn;
Fel lloer ddi-gartref rhwng lluosowgrwydd sêr
Clafychaist am d' Anwylyd hardd dy hun.
Rhwng muriau'r demel neithiwr gwrando wnes
Dy nwyd yng nghryndod dwfn yr organ reiol;
Dy odidowgrwydd ar y pibau pres,
A'th bruddglwyf ar y delyn fwyn a'r feiol,
Nes dyfod esmwyth su'r deheuwynt ir
Oddiar ganghennau pomgranadau'r Tir.

Nodiadau