Prawfddarllenwyd y dudalen hon
III.
Ddyfned ydoedd bedd y bwriad
Drengodd yn ei febyd tlws;
Drymed oedd y maen dideimlad
Dreiglodd dichell ar ei ddrws;
Gwelais engyl glân yn gwenu
Ar y maen, dan wg y byd,
A dwyfoldeb gwawr yfory
Digymylau yn eu pryd.
Cysgod angel yn ein dallu
Yw pob trallod gwrddwn ni;
Ar ei adain, gwawr yfory
Ddaw a'i bendith gyda hi.
IV.
Dyma'r flwyddyn yn anadlu
Gweddill ei heiliadau i ffwrdd;
Collwyd tant o gân y teulu,
Cadair wag sydd wrth y bwrdd;
Nid heb obaith af i gysgu,
Os cymylog fu yr hwyr;
Bydd tiriondeb gwawr yfory
Ar fy mreuddwyd, Duw a ŵyr.
Cilio mae y byd gan sangu
Blodau ar ei daith bob cam;
Enfys gain yw gwawr yfory
Ar dymhestloedd tad a mam.