Bro fy Mebyd a Chaniadau Eraill/Bwlch y Gwynt

Bro fy Mebyd a Chaniadau Eraill

gan Humphrey Jones (Bryfdir)

BWLCH Y GWYNT.

HERFEIDDIOL glogwyn syth,
Mawreddog fyth dy drem;
Chwardd balchder oesol ar dy ael
Dan haul ac awel lem;
Dy gyfarch heddiw wnaf
Wrth gofio'r dyddiau gynt,—
Blynyddoedd hyfryd mebyd mwyn
Hen Glogwyn Bwlch y Gwynt.

Yng nghwmni cyfoed llon
Mor ysgafn fron a'r chwa,
Fath wynfyd ar dy goryn gawn
Ar lawer nawn o ha',
Gwasgarwyd llu o'r plant
Dros fryn a phant i'w hynt;
Ni cheir ond atgof am eu swyn
Hen Glogwyn Bwlch y Gwynt.

Catrodau Llafur sydd
Foreuddydd gyda'r wawr
Yn deffro atsain ddyfna'th fron,—
Edmygedd calon fawr;
Daw rhai ar elor drom
Yn ol er siom o'u hynt,
Cei dithau wylo ffrydiau cwyn
Hen Glogwyn Bwlch y Gwynt.

Hen Gloch Sant Dewi sy'
Yn canu wrth dy droed,
A thithau'n gwrando drwy dy hûn
Mor gyndyn ag erioed;
Gweld cau y cyntaf fedd
Gest ti o'th orsedd gynt,
A'r ola'n agor weli'n fwyn
Hen Glogwyn Bwlch y Gwynt.

Daw eraill ar eu tro
A'u bryd ar ddringo'th ben;
Gan dybio fod dy goryn bras
Yn tarro glas y nen;
Tydi yn aros gaf
Pan af i'm olaf hynt;
Rho un ochenaid er fy mwyn
Hen Glogwyn Bwlch y Gwynt.

Nodiadau