Bro fy Mebyd a Chaniadau Eraill/Cartre'r Plant

Bro fy Mebyd a Chaniadau Eraill

gan Humphrey Jones (Bryfdir)

CARTRE'R PLANT.

I.

BUM yno gyda'r cyfnos,
A'r gaea'n edwi'r ddôl;
Ond oerach lawer oedd y tŷ
Adewais ar fy ôl;
Dau blentyn bach amddifad
Gymerais gyda mi,
A Duw yn syllu drwy y ser
I'r llawr ar ddagrau'n lli'.

Pan gurais ddrws y Cartref,
Yr oedd calonnau dau
Yn curo'n drymach lawer iawn,
A'u dagrau'n amlhau.

II

Agorwyd drws y Cartref
Gan riain hawddgar wedd,
Ond iddynt hwy ni wnaeth y ferch
Ond agor porth y bedd;
Drwy ystafelloedd eang
Cerddasom gam a cham,
Heb weled yno wyneb tad
Na phrofi croesaw mam.

Arhosais yn y Cartref
I'w llonni, awr neu ddwy;
Ond hawdd oedd gweld fod hiraeth trwm
Am aros yno'n hŵy.

III.

Daeth cwsg fel angel heibio,
A'i dywel yn ei law,
Cyn hir i sychu dagrau'r ddau,
A gwasgar ofn a braw;
Er bod y gwynt yn cwyno
Fel alltud ar y rhos,
'Roedd yno dorf mewn corlan glyd
Yn tawel dreulio'r nos.

Dyngarwch wnaeth y Cartref
I blant amddifad, trist;
Os methais weld eu rhiaint hwy,
Mi welais Iesu Grist.

IV.

Gadewais byrth y Cartref,
Wynebais wyll y nos;
Edrychais i'r ffurfafen bell
A gwelais seren dlos;
Goruwch y fan gadewais
Y plant amddifad gynt,
Tywynnu wnai y seren hon
Ar waetha'r nos a'r gwynt.

Mae Duw yn arwain dynion
Drwy'r ser o oes i oes;
Ac nid yw Cartre'r Plant i mi
Ond un o flodau'r Groes.

Nodiadau