Cerddi'r Bwthyn/Y Medelwyr

← Unigeddau

Cerddi'r Bwthyn gan Dewi Emrys

Doe

Y MEDELWYR

[Yn ôl darlun Millet].

AR leindir aur lle plygant wrth eu tasg,
Ag iddynt fedel sy'n ddirgelwch im,
Gŵyrant dan bwys rhyw orfod trwm a wasg
Eu trem i'r ddaear fel na choller dim.
Eithr gyda'r taer ymestyn, drem a braich,
A'r lloffa nad yw'n llaesu ennyd awr,
Onid oes iddynt hwy amgenach baich
Nag ofn ysgubor wag a thlodi mawr?
Bron na ddaw gwayw i'm gwar o weld y rhain
Yn crymu heb esmwythyd cefnau syth
Malpai i'w hymchwil, rhwng y tywys main,
Drysor a'u ceidw o dan ei ormes byth.
Diau pe plygwn fel y plygant hwy,
Y doi i'm gafael innau olud mwy.