Cerddi a Baledi/Y Daran

← Yr Ehedydd

Cerddi a Baledi Caneuon gan I. D. Hooson Caneuon

Yr Ysgyfarnog →

Y DARAN

WEDI dyddiau o wres
Ac o fyllni haf,
Wele'r gawod a'i rhin
Ar y meysydd claf.

Distawai'r fwyalchen
Ym mrigau y pren;
Ond arall aderyn
A ganai uwchben.

O'i lwyn yn y cwmwl,
Ei alaw oedd groch;
A fflachiai'i adenydd
Yn llachar a choch.

Ac arno gwrandawai'r
Fwyalchen yn syn;
Ac yntau'n ymlusgo
Dros ysgwydd y bryn.

Ond wele yr Heliwr
Yn dyfod o'i blas,
Ei wyneb yn ddisglair
A'i fantell yn las;

A ffodd yr aderyn
O'i wyddfod yn ddig,
A moliant yr Heliwr
A lanwai y wig.