Devs ren

Yn flaenorol: Meigant

Yn nesaf: Hervit vrten

Devs ren rimawy awen Amen fiat.

Fynedic waud fruythlawn traethaud trybestraud heid.

Hervit urten autyl kyrridven ogyrven amhad.

Amhadanav areith awyrllav y cavkeineid.

Cuhelin bart kymraec hart kidvrthodiad.

Kert kimuynas ked kywtas nifain tinieid.

Gathyr kywystraud kyvan volaud clutaud attad.

Kywrgein genhid cor a chiwid kyhid kydneid.

Kywyrgyrn kyvle kywlaun flamde kywvire vad.

Kenetyl woror kywrisc woscord kyghygueid.

Kywolv waur kywarvs mavr kir llavr eircheid.

Kerit vychod kerenhit nod clod achvbiad.

Clo kelvid kant kalan kid kynvllid greid.

Greid bleit blyghaud Gretyw detyw duraud. gnaud branduriaeth.

Gur oet eitoel gorvyreol gordethol doeth.

Gvytbuil dragon gosparth brython. gosgyman gvith.

Gnaud tryganet gnaud kyhidet gorsset metveith.

Mettvin kywran marchauc mitlan mann meidrolaeth.

Meitrid mur ior maus pedir pedror maur cor kyvoeth.

Moes vreisc vreyr moes wirth vehir milwir orvith.

Maer claer kywid mad cathyl kyvid moidit ieith.

Mas cas nognav minhev nev frav molav frav fraeth.

Muner uodauc maer anhetauc maretauc doet.

Mdel visci mel vartoni mynogi gvyth.

Mynvinad vron metv ton dros traeth.

Mer kertev kein mywir covein mirein anoeth.

Menestir vytud meuvet vetvd molud esmuith.

Music a gan mal eur orian man vahanieth.

Gveith reith rysset gvich ruich ryuet rinuet reen.

Rec rysiolaw rec a archaw ruymav iurthen.

Ruthur vthir avel rynaut uvel ryvel vebin.

Ruteur dyrllit rychlud clodrit rihit aden.

Rev wet paraud rin vynn wascaud tra gwaud wobrin.

Ry hait itaut rycheidv y naut rac caut gelin.

Ry chedwis detryf ry chynis gretyw rac lletyw ogyrven.

Rac dac drossow reghid brid bot rot cuhelin.