Gwaith Goronwy Owen Cyf II/Arwyrain y Nennawr

Gwaith Goronwy Owen Cyf II

gan Goronwy Owen

golygwyd gan Owen Morgan Edwards

ARWYRAIN Y NENNAWR.

THE GARRET POEM

CROESAW i'm diginiaw gell:
Gras Dofydd! gorau 'sdafell.
Golygle a gwawl eglur,
Derchafiad offeiriad ffur.
Llety i fardd gwell ytwyd
Na 'r twrdd wrth y bwrdd a'r bwyd:
Mwy dy rin am ddoethineb
Na gwahadd i neuadd neb.
Hanpwyf foddlon o honod,
Fur calch; ond wyf falch dy fod!
Diau mai gwell, y gell gu,
Ymogel na 'th ddirmygu;
Nid oes—namyn di foes da
Was taer—a 'th ddiystyra:
Ai diystyr lle distaw
Wrth grochlef yr holl dref draw?
Lle mae dadwrdd gwrdd geirddadl
Rhwng puteiniaid a haid hadl,
Torfoedd ynfyd eu terfysg;
Un carp hwnt yn crio, Pysg';
Tro arall Howtra hora';
Crio Pys, Ffigys,' neu Ffa.'
Gwich ben a trwy ymenydd,
Dwl dwfr, trwy gydol y dydd;
Trystiau holl Lundain trosti,
A'i chreg waedd ni charai gi.
Os difwyn—gwae ddi sdafell—
Clywed nid oes gweled gwell;
Gweled ynfyd glud anferth
O'r wâr a fynnych ar werth!
Gwên y gŵr llys, yspys oedd,
Eddewidiwr hawdd ydoedd;

Cledd y milwr arwrwas;
Dwndwr yr eglwyswr glas;
Cyngor diffeith cyfreithiwr;
Trwyth y meddyg, edmyg wr;
Diod gadarn tafarnwas,
Rhyw saig gau ei frwysgwraig fras;
Rhad werth ar pob rhaid wrthaw,
Corff, enaid, llygaid, a llaw;
Ond na cheir gan ddiweirdeb
Prisiau am eneidiau neb,
Ond enaid anudonwr
A'i chware ffals, a chorph hwr.
Dyna'r gair yn eu ffair ffol;
Dedwydd im gell a'm didol
Tua'r nen uwch eu pennau;
Amor it', ymogor mau!
Per Awen i nen a naid;
Boed tanodd i buteiniaid.
Tra fo 'm cell i'm castellu,
Ni 'm dawr a fo i lawr o lu.
Ni ddoraf neuadd arall;
Ni chlywaf, ni welaf, wall.
Heddyw pond da fy haddef,
A noeth i holl ddoniau nef?
Gwelaf waith Ion, dirion Dad,
Gloew awyr a goleuad;
A gwiwfaint fy holl gyfoeth
Yw lleufer dydd a llyfr doeth,
A phen na ffolai benyw,
Calon iach, a chorph bach byw,
Deuryw feddwl di orwag,
A pharaus gof, a phwrs gwag,
A lle i'm pen tan nennawr,
Ryw fath, drichwe' llath uwch llawr.

Nodiadau