Gwaith Huw Morus/Brad y Powdwr Gwn

← Traws Naws Nwy

Gwaith Huw Morus gan Huw Morus (Eos Ceiriog) golygwyd gan Owen Morgan Edwards

Swn Corddi →

BRAD Y POWDWR GWN.

OND trist i Bapist ar bob pen—y dydd,
Yn y dwyll genfigen,
Amcanu mwya cynnen,
A dwrn y Pab dorri'n pen?

Mawr, mawr, nod rhyfawr i blant Rhufen—gas
Geisio brig brenhin—bren;
Lladd llywydd y llwydd llawen,
Llew a gâr wyr holl Loegr wen.

Beth a dâl dyfal weddi deufin—gŵr
Heb gariad yn wreiddyn?
Ni thal i ffydd beunydd bin,
Heb wir fron bur i'w frenin.

Da yw i'r doethryw, di-athrist—galon,
Gilio oddiwrth Anghrist,
Gwrthsefyll Pab a'r Pabist,
Yn enw cryf eneiniog Crist.